రోహిత్‌పై నమ్మకం.. జైస్వాల్‌కు అన్యాయం: స్టార్ కల్చర్‌పై మంజ్రేకర్ ఫైర్

ఇంగ్లండ్‌తో వచ్చే నెలలో ప్రారంభం కానున్న వన్డే సిరీస్ కోసం భారత జట్టును ప్రకటించిన సెలక్టర్లు, సీనియర్ ఆటగాడు రోహిత్ శర్మపై మరోసారి తమ నమ్మకాన్ని కొనసాగించారు. అయితే, ఈ ఎంపికపై భారత మాజీ క్రికెటర్, ప్రముఖ వ్యాఖ్యాత సంజయ్ మంజ్రేకర్ తీవ్ర అసంతృప్తి వ్యక్తం చేశాడు. ముఖ్యంగా అద్భుతమైన ఫామ్‌లో ఉన్న యువ ఓపెనర్ యశస్వి జైస్వాల్‌ను పక్కనపెట్టడం అన్యాయమని అభిప్రాయపడ్డాడు.

'టైమ్స్ ఆఫ్ ఇండియా'కు ఇచ్చిన ఇంటర్వ్యూలో మంజ్రేకర్ మాట్లాడుతూ.. "యశస్వి తాను ఆడిన చివరి మూడు వన్డేల్లో రెండు సెంచరీలు చేశాడు. దక్షిణాఫ్రికాపై 116 పరుగులతో నాటౌట్‌గా నిలిస్తే, ఆఫ్ఘనిస్థాన్‌తో జరిగిన మూడో వన్డేలో అజేయంగా 110 పరుగులు సాధించాడు. భారత జట్టులో ఓపెనర్‌గా వచ్చిన అవకాశాలను అతను రెండు చేతులా సద్వినియోగం చేసుకున్నాడు. అలాంటి ఆటగాడిని పక్కనపెట్టడం దురదృష్టకరం, ఇది కాస్త కఠినమైన నిర్ణయమే" అని స్పష్టం చేశాడు.

రోహిత్ శర్మ ఎంపికను ఉద్దేశించి మంజ్రేకర్ కీలక వ్యాఖ్యలు చేశాడు. "2027 ప్రపంచకప్‌ ప్రణాళికల్లో రోహిత్‌ ఒక భాగమని సెలక్టర్లు భావించి ఈ నిర్ణయం తీసుకుంటే మంచిదే. అలా కాకుండా కేవలం అతని స్టార్‌డమ్ కారణంగా, తప్పించలేక జట్టులోకి తీసుకుంటే మాత్రం అది ఆమోదయోగ్యం కాదు" అని అన్నాడు. భారత క్రికెట్‌లో పెద్ద పేర్లున్న ఆటగాళ్ల చుట్టూ ఉండే సంస్కృతిని తప్పుబట్టాడు. "మనకు పెద్ద ఆటగాళ్ల సంస్కృతి గురించి తెలుసు. ఇక్కడ కేవలం ఆటతీరు ఆధారంగా నిర్ణయాలు తీసుకోవడం చాలా అరుదు. రోహిత్ విషయంలోనూ అదే జరుగుతున్నట్లు కనిపిస్తోంది" అని విమర్శించాడు.

"సెలక్షన్ అనేది విరాట్, రోహిత్ లేదా బుమ్రాకు ఏది మంచిది అని కాకుండా, భారత క్రికెట్‌కు ఏది ఉత్తమమో దాని ఆధారంగానే ఉండాలి. ఏళ్ల తరబడి భారత క్రికెట్ ఎదుర్కొంటున్న అసలు సమస్య ఇదే" అని మంజ్రేకర్ ఆవేదన వ్యక్తం చేశాడు. ఇదే సమయంలో 15 ఏళ్ల యువ ఆటగాడు వైభవ్ సూర్యవంశీ ఇంగ్లండ్, ఐర్లాండ్ పర్యటనల్లో రాణించాలని ఆకాంక్షించాడు. గతంలో శ్రీలంక-ఏ ఆటగాడితో జరిగిన గొడవ నుంచి అతను పాఠం నేర్చుకున్నాడని, భవిష్యత్తులో మరింత పరిణతితో వ్యవహరిస్తాడని ఆశాభావం వ్యక్తం చేశాడు.